PREMIOS EXTRAORDINARIOS DE BACHARELATO CURSO 2023-2024

  

A finalidade destes  premios é recoñecer e valorar os méritos do alumnado que cursou cun excelente resultado académico o bacharelato na Comunidade Autónoma de Galicia.

Poderase presentar o alumnado   que cumpra os seguintes requisitos: 

 

• Ter rematado os estudos de bacharelato no curso 2023/2024 nun centro docente da Comunidade Autónoma de Galicia e ser proposto para título na convocatoria ordinaria do dito curso.

• Ter obtido unha nota media do bacharelato igual ou superior a 8,75 .

Forma e prazo de presentación de solicitudes:

As solicitudes presentaranse preferiblemente por medios electrónicos a través do formulario dispoñible na aplicación informática «PremiosEdu».

O prazo de presentación de solicitudes será dun mes; comezará o día 29 de abril de 2024 e rematará o día 28 de maio de 2024.

Data da proba:

Para optar ó premio extraordinario o alumnado deberá realizar unha proba presencial terá lugar o día 19 de xuño de 2024 e realizaranse nos lugares e horarios que serán publicados próximamente. 

Estrutura da proba:

Estrutúrase en dúas partes:

• 1ª parte, que se desenvolverá en tres horas:

1.1.- Análise e comentario crítico dun texto sobre un tema de carácter xeral, histórico, filosófico ou literario.

Para a resolución deste exercicio será preciso usar as dúas linguas cooficiais ( agás o alumnado que teña recoñecida a exención na materia de Lingua galega).

1.2.-Resposta a cuestións de carácter cultural ou lingüístico sobre un texto na Primeira Lingua Estranxeira II cursada polo alumnado como materia común do bacharelato. O exercicio realizarase sen dicionario no idioma correspondente.

• 2ª parte, que se desenvolverá nunha hora:

-Desenvolvemento de temas, respostas a cuestións e/ou exercicios prácticos dunha materia de modalidade cursada polo alumnado, a elixir entre as seguintes: Matemáticas II, Matemáticas Aplicadas ás Ciencias Sociais II, Latín II, Debuxo Artístico II, Análise Musical II e Artes Escénicas II.

Cualificación:

Os exercicios da proba cualificaranse entre 0 e 10 puntos cun decimal, agás o exercicio de análise e comentario que se puntuará con 20 puntos.

A puntuación de cada parte da proba obterase mediante a suma das puntuacións das materias que a compoñen.

A puntuación total será a suma das puntuacións obtidas en cada parte da proba. Para aspirar ao premio extraordinario, o alumnado deberá obter como mínimo 10 puntos no exercicio de análise e comentario e 5 puntos en cada un dos demais exercicios da proba e 25 puntos ou máis na puntuación total.

• Podes consultar a convocatoria completa no seguinte enlace:

https://www.xunta.gal/dog/Publicados/2024/20240426/AnuncioG0761-190424-0004_gl.pdf

• Para consultar exames de convocatorias anteriores preme no seguinte enlace:

https://www.edu.xunta.gal/axudaplicacion/AxudaNonIncrustadaCache.do?claveBusca=axuda_premiosedu_informacion_probas_bac&idTipoContido=4

• Para facer a solicitude para participar nas probas preme no seguinte enlace:

https://www.edu.xunta.gal/premiosedu/

A continuación tedes unha folla resumo coa información importante sobre este procedemento:

 

O alumnado procedente do IES Lamas de Abade realizará a proba no CIFP Politécnico de Santiago. Rúa Rosalía de Castro, n.º 133, Santiago de Compostela.

A distribución do alumnado aspirante para os lugares de celebración da proba segundo o centro de procedencia pódese consultar no seguinte enlace:

https://www.edu.xunta.gal/portal/sites/web/files/premiosbac_2324_resolucion_lugares_con_anexo_g.pdf